Jugendleiteruusflug...
Von Marisa Mathez am SLRG Sektion Rüti
Am Samstigmorge zu völlig unmenschliche Ziite hät eus de Wecker gnadelos usem Tüfschlaf grisse. No völlig verschlafe, d Auge no chum offe, händ mir eus ufem Sunneplatz troffe. Mit ere Charte händ mir eus als OL-Fahrer versuecht. Es isch alles guet gange, bis mir z Schiers gsi sind. Det hämer zersch mal ungewollt s Dörfli betrachtet. S Wende hät alles gfordered vom Melvin, eusem Fahrer. In Schiers simer aber nöd blibe, sondern d Reis isch wiiter gange mit em Postauto uf St. Antonia. Das Dorf wo selber de Slogan hät: Hinter dem Mond links.
Da mir ja alles Topsportler sind, händ mir eus nöd neh la, die schöni Berglandschaft z erkunde. Mer hät genau gmerkt, wers Küken i eusere Mannschaft isch. Chum 5 Minute gloffe mümer eus de Frage vom Döme stelle. Wie lang gaatz no? Wenn gitz zesse? Ich han Hunger! Im urchige Bergrestaurant hämer eus dörfe es Menü uswähle. Öb Rösti mit Spiegelei, Rösti mit Speck, Rösti mit Chäs, Hofrösti oder Capuns es hät bestimmt für jede öpis gha. Nach doch rächt langem Warte und de no hüferige Frage vom Döme "wenn chunts Ässe?" hät de Wirt Mitleid becho. S Ässe isch meega fein gsi! Da's immer stiller worde sich am Tisch gönd mir devo us, dass es de andere au so gange isch. Nachem schweere Esse händ mir eus alli ufd Trottinetfahrt gfreut. Echli d Bei entspanne nachem Spaziergang. Am Afang hät sich das ja au als Entspannig entpuppt und die erschte alte Häsli händ sich au scho über Chrämpf idä Finger vom viele bremse beklagt. Doch dänn isch alles andersch cho. Usem afängliche ‚es chönt villicht no wehtue wegem Bremse, händ sich am nächste Tag no viel beklagt wege Muskelkater idä Bei. Das isch nöd öppe gsi vom spaziere, sondern de Urs hät d Route vom Trottinetfahre ä chli gändered. So simer mit hoch roote Chöpf, starch atmende Dame und schweere Trottinet obe amene würkli höche Berg acho. Das d Sunne sich vo de schönste Siite zeigt hät, häts au nöd besser gmacht. Da hät sich usekristallisiert welles eusi wahre Porfisportler und weles eusi Amateurinne sind. Zum Glück hät eus de Urs nöd zvill versproche und es isch würklich nomal es rechts Stuck abegange geg de Schluss. Urs, danke vill mal fürs super organisiere. Es isch en super geniale und lustige Tag gsi.
